مواقف مضحكة/محرجة مع مرضانا الأحباء (( شاركنا))

[نادرالعدني]

السلام عليكم ورحمة الله وبركاته ...

ياهلا ومليون غلا فيكم جميعا ... من ممرضين و ممرضات إلى آخره


* طبعا مثل ماكلنا عارفين أكيد أحيانا نتصادف مواقف إما أن تكون محرجة أو تكون مضحكة أو تكون محزنة مع مرضانا .. حفظهم الله ورعاهم ...

فأكيد وقتها مانقدر نضحك من قلبنا ... ولا ننزل دموعنا .... بس أكيد تبقى هذه المواقف راسخه في الذاكرة
a

* فخلونا مع بعض ... نتشارك في هذه المواقف ... فنفرح لفرحهم ولنحزن لحزنهم ...

*


وإن شاء الله تعجبكم الفكرة ....



بسمه نبدأ ...


* في مرة كنا نعمل Bed Bath لأحد المرضى ... المهم .. فسبحناه وكشخناه وكل شئ ... وآخر شئ قالنا رووووحواااااااا جيبوا لي العروسة بسرعه ههههههههههههه .. وقتها ماقدرنا بصرحاه فطسنا من الضحك ... وربي ماراحم عمره بعد باغي عروسة ..

*موقف محزن .. لما شاهدت أحد المرضى وهو متوفى ... والممرضات يكفنوه .. بالفعل موقف لا يحسد عليه .. يوم كامل ماقدرت اسوي شئ ... طول الوقت في بالي وصورته ماتففارقني ... لان أول مرة أشوف ميت قدامي ... الله يرحمه ...



وان شاء الله أي مواقف تصير لي بخبركم


وأنتظر مشاركاتكم


تحياتي لكم
نادر العدني

ارجوا التثبت

[SHAIM]

هنالك ما يسمى بعهد المهنة ..... أو قسم المهنة .....

كم كنت أتمنى أنك ألممت بشيء يسير منه .... أو اطلعت عليه .....

[نادرالعدني]

حبيبي انا جالس اقول بشك عام انا ما حددت فلان وعلان انا اتكلم بشكل عام والله نحن ما خلنا كذا الا الكلام ذا

[علي أحمد]

شكراً نادر الموضوع جميل وفكرته حلوة

انا اتذكر يوم كان الاخصائي الاجتماعي اجازة وغطيت مكانه وكنت مسوي جولة على المرضى المنومين ,فلقيت الطبيب يكلم احد المرضى وينصحه بعدم اكل الحلويات حتى ينخفض السكر وكان الشايب زعلان شكله يموت في الحلويات ,, ودخلت انا عرض بينهم انصح المريض وهو مطنش لي والطبيب ,بعدين سالته وش اسمك يا حاج ؟؟؟؟؟؟
وهو منقهر قال ,,,,,,,,,,,,,,,, اسمي الشيطان الرجيم

ههههههههههه والله انا ماقدرت طول اليوم اتذكر شكله واضحك خصوصاً اني ما كنت اتوقع اجابته بتكون كذا

[علي أحمد]

موقف محزن ,,,,
قبل خمس سنوات كنت اعمل في العيد (مكلف) وفي صباح يوم عيد الفطر كنت مع الشباب الفنيين في الاسعاف نعيد على بعض وندردش حيث كان المراجعين عددهم قليل ,, حضر رجل وحامل طفله بين ذراعيه والدم على كامل الطفل , وضع الطفل على سرير الفحص وحضر الطبيب وطلبنا باقي الاطباء الموجودين في المستشفى وعملوا له سي بي ار لكن ما قدروا يسون شي ,,, جاني ابوه وهو يبكي والله اي واحد يشوفه يبكي معه ويقول كنا ننظف البيت عشان العيد ونرتب الصالة والولد يلعب جنب مكتبة التلفاز وسقطت عليه ..
موقف والله يقطع القلب ذاك العيد ما تهنيت فيه من هذا الموقف
الله يحفظ اطفال المسلمين من كل مكروه

[العالمي]

..موضوع طريف وشيق اعتقد مافيها اشكاليه اذا ذكر البعض تجاربه مع المرضى اذا التزم بعدم ذكر الاسم لانه يعتبر مجهول لدينا المواقف كثيره اخي الكريم ههههههههه بس يبي لها وقت نذكرها الموضوع مفاجئ كل ماذكرت شي بكتبه بألف كتااب تحياتي ..

[نادرالعدني]

انا اتذكر في هذة السنة بالحج كنا يوم في نوبة الليل فيومها دخل عندنا مريض ما ندري وش فية تسألة ايش اسمك يقولك بلال
طيب بلال ايش يقول بلال بن رباح الرجال شكلة مضيع
بس وحدة من الممرضات الهنود دخلت تشيك على العلامات الحيوية الرجال انجن يوم شافها بس نحن جالسين على الرسبشن ونسمع الممرضة تصرخ وتجري وراها الرجال يجري بس وندخل ونمسك الرجال وش فيك وراها بتجري الرجال جالس يقوول سيبوني هذة الحور العين حقتي فكوني الحور العين بس نحن على طول كلنا فكينا ضحك
المشكلة ان البنت كانت وبشة هههههههههههههههههههههههه

[العميد]

انا اتذكر في هذة السنة بالحج كنا يوم في نوبة الليل فيومها دخل عندنا مريض ما ندري وش فية تسألة ايش اسمك يقولك بلال
طيب بلال ايش يقول بلال بن رباح الرجال شكلة مضيع
بس وحدة من الممرضات الهنود دخلت تشيك على العلامات الحيوية الرجال انجن يوم شافها بس نحن جالسين على الرسبشن ونسمع الممرضة تصرخ وتجري وراها الرجال يجري بس وندخل ونمسك الرجال وش فيك وراها بتجري الرجال جالس يقوول سيبوني هذة الحور العين حقتي فكوني الحور العين بس نحن على طول كلنا فكينا ضحك
المشكلة ان البنت كانت وبشة هههههههههههههههههههههههه



و الله اول شي الموضوع فكرته حلوة


الشي الثاني انه المواقف كثيرة لكنها دايماً تكون مضحكة مبكية

:confused: :confused: :confused:

[العميد]

من المواقف لنا زميلة في المجال الصحي كانت تسحب دم لاحد المرضى و فجاء اصيبت باغماء راحوا الزملاء و الزميلات يسعفوها و فعلا اسعفوها وفاقت لكن اصيبت باغماء مرة ثانية فوضعوها على الكرسي المتحرك لنقلها الى قسم الطوارئ و في هذه الحظة قامت احدى الزميلات بسح ظهر الكرسي ليصبح الكرسي سيرير لكن المسكينة خبط راسها في طاولة كبيرة و اغى عليها ولما فاقت صارت تبكي من شدة الالم و زملائها يضحكون من الموقف .
:D :D

[هجير الليالي]

في مره من المرات في ايام التدريب
اول مالبسونا الباطوا الرمادي (ان شاء الله الي حطه يلبسونه فسفوري)
كنا نتمشي في السيب الا تجينا وحده تاشر لنا بيدها ونظرتها خوف على استغراب
وتقول لنا انتم اكيد من المباحث حنا خلاص فطسنا ضحك لهذي الدرجه حنا نخوف


وحده ثانيه شفتنا قالت سستر كلينر تعال نظف حمام :eek: ما قدرنا نمسك روحنا زين ان:D :D :D

ماحد يمنا من الدكاتره والا كان تفشلنا عدل

هذا كل ما يحضرني الان

[نادرالعدني]

ههههاي مو معقول لهذة الدرجة بصراحة صرتم نكت والف شكر اختي هجير الليالي على المشاركة الجميلة واتمنى منكي المزيد

[<-hearts theif->]

هههههههههههههه اضحك الله سنكم
مرة من المراري (هههه متاثر بالعمليات)
كان واحد من الشباب قبل مايخش غرفة العمليات يسوي سكرب والولد لونه اسمر محروق ويشبه الهنود اللي ينظفون في المستشفيات حتى انا كنا نسميه برذر المهم خشت عليهم الدكتورة وقامت تزعق عليهم وتقول بسرعه ادخلوا غرفة العمليات وطالعت لقيت صاحبنا قاعد يسوي سكرب قالت ايش مقعد **** هنا قام هو عشان يتجاوز الموقف يكلم خويه سعودي عشان تفهم انه موظف معهم بعدها شوف الموقف الشباب فطسوا من الضحك والدكتورة اختبصت ووجها صار زي النمله ولا قدرت تتكلم وفطست ضحك ومن يومها كل ماتذكرنا السالفه قعدنا نضحك:d

[فني طوارئ طبيه]

ههههههههههههههه

طيب وش رايكم بذي...

مره في قسم الطوارئ جالس اعطي ابره وريد لواحد شايب الله يهديه المهم من فضل ربي ان رئيس قسم الطوارئ
كان مار وانا اعطي الابره الحمد لله (ووقف معاي)
طبعا ولله الحمد من خفه يدي المريض ما حس بوخزه الابره المهم خلصت وقلت لشايب خلاص
طالع فيني بنظره غريبه وقال لااااااااااااااااا وبعدها قام يصيح ويقول ابي الابره يقول اني ما اعطيته الابره
احرجني قدام الاطباء والفنين اصحابي وهم يضحكوون على الموقف
المهم جاء رئيس القسم يقوله انه شافني وانا اعطيه الابره ويهدي الشايب
وانا من يومها اتحاشا ذا الشايب الجه الله يهديه بس

[فني خطير]

مرة من المرات احد زملاءنا الممرضين بيعطي ولد مغذي نورمل سلاين المهم ربط القلفز حول بدة عشان يوضح العرق وركب الابرة مزبوط صيت المغذية شوي الاابو الولد يطالع المغذية كلها دم ويصايح على الممرض الممرض اللة يهدية نسي يفك القلفزالمهم رفض الرجال المغذية راح ابو الولد يشتكي طلبناة يسامحنا وسامحنا
خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخ
مرة وحدة عجوز جتني بالصيدلية تقول يوليدي عطني برهم للحساسية تقصد مرهم طبعا
خخخخخخخخ خخخخخخخخخخخخ خخخخخخخخخخخخخخخ خخخخخخخخخخخ خخخخخخخخخخخخخ

[بندر..]

أيشششششششششششششششششششششششششش هذا يافني خطير
تضحك من كلام عجوز للي هي جددك وامك وزوجتك في المستقبل
انت خطير على وش على الدبلوم للي معك اوبنزين سريع الاشتعال

[فني خطير]

اخوي بندر اللة يعطيك العافية حنا نذكر المواقف الطريفة مافيها شي اذا قلت موقف طريف بدون تذكر اسم احد
ياليت تطور من ثقافتك شوي

[نادرالعدني]

الف شكر اخواني على المشاركة الظريفة بس حللللوة اخوي فني خطير على برهم الحساسية ههههههه والله يعطيكم الف عافية وعيب عليك اخوي بندر ولا تاخذ الموضوع بحساسية زايدة

[خريج معهد خاص]

انا كنت في فترة الامتياز قبل سنة

عندنا شايب كبير في السن (طاب الفيظة)

سوينا له bed meking يوم خلصنا

وتربع على السرسر قال عطوني ذلولي ابنهج لهلي



وفية مواقف كثيرة بس هذا اللى جا على بالي

[نادرالعدني]

السلام عليكم ورحمة الله وبركاتة
اليوم بااجبلكم موقف صار اليوم
في عندنا مريض عندة انتيميا ومشكلة في الكبد فقام الطبيب بطلب وحد من الدم وحدة من البلازما
فشرحنا للمريض اننا حنعطية الدم كذا وكذا بعدما انتهى الدم جبنا البلازما جينا نعطية الا الاخ رافض ؟! ياولد
اشفية ليش رافض بس كام الاخ يقول : انتم مهمليين تبون تموتون المرضى انتم فيكم كذا وكذا بس والا يبي يشتكي مدير المستشفى ونحنا نسألة ياعمي يابويا ايش فية وهو شغال انتم كذا وكذا
بس والله نائب المدير طلع القسم وقالة : ها يابوي خير ايش اللي صار
المريض : يادكتور هذولا التمريض مهمليين يبغون يعطوني دم لونة ابض بعدين يتفلسف بالله عليك يادكتور في دم لونة ابيض هذا دم خربان
والله انة منسم بس الدكتور فك ضحك وجالس يفهموه انه هذا الكيس هو احد مكونات الدم ونحن على طول فكينا كااااااااااااااي ههههههههههههههههههههههههههههههههههههههه

[ميمو]

هههههههههههههههههههههههههههههههههههههههههههههههههه هههههههههههههههههههههههههههه
فيه قصة كان فيه شيبان اثنين صار عليهم حادث واحد دخل العنايه والثاني بقس الجراحه اللي في العنايه يوم صحى حصل كل شي حوله ابيض في ابيض والممرضات مزايين انبسط فكر انه في الجنه مرة وحده عليه قالت تبي شي عمو قال سلامتك بس ابي اسال عن( عويد ) خويي وينه قالت مو هون قال (والله اني داري فيه عويد دينه ردي )يحسبه في النار.....

[ZOZO-STAR1]

صارت عندي مريضة حامل بكريه
من أول مادخلت القسم وهي تصرخ
سألتها حبيبتي ليش تصرخي وأنت ماعندك ألم
قالت عشان أولد
لأن كل النسوان يصرخون وهم يولدون
فأنا باصرخ عشان يطلع راس البيبي

[هجير الليالي]

حلوة يازوزو ذكرتيني بالايام الخوالي انا وحدة مسكت ايدي وهي بتولد بغت تكسر اصابعي قلتلها امسكي الحديد على الاقل ما يحس قالت لي انتي نحيسه وجلست تبكي وسلمتها ايدي وامري لله

[ابن المدينة]

من المواقف المحرجة جداً في فترة الامتياز
تشاجرت مع مريض بسب اسم المريض سألته عن اسم المريض للتأكد فقط ولكي لا يحصل أي خطأ في تسلم الدواء فقال لي : مالك شغل !
فرميت الوصفه في وجهه وكان ضغط العمل والزحمة للمرضى على الشباك لها تأثير و تلفظ بكلام ورفع صوته ورفعت صوتي وذهب المريض في حاله
المهم بعد شهرمن الحادثة ذهبت لدأئرة حكومية لأجل معامله متعثرة في قسم الشؤون المالية فذهبت لمكتب مكتوب عليه رئيس الشؤون المالية فطرقت الباب ودخلت واذا بالمكتب العريض الطويل والجالس خلفه نفس المريض الذي تشاجرت معه هو تذكر شكلي ولكن أين رأني لا يدري ومتى لا يدري فسألته سؤال قصير جداً فأجابني وضربت الباب بأقصى سرعه لكي لا يتذكر أكثر وسلمتم

[نادرالعدني]

الله يعين
بس اخي العزيز مهما كان يجب ان تكون معاملتنا حسنة مع المريض مهما كان ضغط العمل وشكرا على المشاركة الجميلة

[نادرالعدني]

لـــقــد عــــدنــا:

اخواني الاعزاء اتذكر مرة في مريض ليبي كان عندنا منوم والله له فترة طويلة منوم ولا احد اخذة بس طفشنا منة سوينالة اوراق الترحيل وكل شي ( متخلف عمرة ) المهم بس وجاء اليوم اللي بنرسلة الى المطار فرحت انا واحد من الخدمة الاجتماعية الى المطار والله الرجال ما يبي يدخل المطار بس بنقلة يابو شريط اشبك امشي يلا وصلنا المطار مع العلم انة اكل مخنا ودوني ليبيا ودوني ليبيا بس والله بالقوة دخلناه المطار
والله وقلت والله ايش النكبة مع المريض ذا
شوي الا ويقول والله ماني رايحة الين تعطوني الجواز تبعي بس يابوي وين الجواز اعطوة شوي قام ابغى عشرة الريال
خويي قام : ايش تبغى بالعشرة ريال بس والله ويدور بجيبة في عشرين
خذ هذة الفلوس شوب يقول انا قلت ابغى عشرة بس هههههههههه
ما يبغى العشرين قنالة مافي والا هجد شوي
بس ودخلنا صالة المغادرة والا قام مرة ثانية ابغى اتعشى يابويه وايش تبغى عشاء
يقول : ابغى اكول كباب شكلة قال والله فرصة امكن عمرة ما ذاق الكباب بس سمع الاسم ههههه
والله وندور بالمطار كباب مافي الا كرواسان بس والله اشتريتلة الحبة 15 ريال قلت يالطيف انا ليا ما اشتريت كرواسن ب 15 ريال هههههههه
يلا ممكن يعجبة الا الرجال ما يبغى ابا كباب
وشوي الا جاء النداء تبع المغادرة وطلع ومابغى يطلع هههههههههههههههههه

[فصوووول المدينة]

تصدقون مشتاق تصيرلي مغامرات زيكم


وبعدين ياليت يبت الموضوع وخلونها مغامرات طبية هههههههههههههههههههههههههههه


ولاهنت اخوي نادر الله يشدك بالعافية

[قلوب بيضاء]

ههههههههههههههههههههههههههههههههههههههههههههههه حلوه مواقفكم
انا ممرضه بقسم الاسعاف ومواقف كثيره تصير بالقسم عندنااااا
ويمكن مايحضرني الا هذه الموقف
جانا مريض هندي وجلس يشكي لنا ساعه واحنا موفاهمين عليه رحت ادور على واحد نفس جنسيته يترجم
بس تفاجات ان اصابع رجله مقطوعه وحاطهم بيورن كونتينر وذ سلااين لاانه جاي من مستشفى برايفت وقالوله رح المستشفى الفلااني واصابعه عفنت ورجله راحت فيه بس من جد تعبت وانااااااااااا ابي افهم عليه سااااااعه

[ابو فرح]

اسعد مسائكم
انا موقفي باختصار جاني مره كبير سن بيزور فمن الاحترام له ذهبت انا وياه للمريض فسلمت للمريض انا ووقفت وعند قيام كبير السن بالسلام عليه انحنى للمريض على السرير فسقط عليه واخذ المريض يأن خصوصا انه مصاب في حادث سير فكان موقف محرج

[آحـزآن المـاضـي]

السلام عليكم جميعا

هذه أول مشاركه لي وعجبني الموضوع


وانا فني مختبر صار لي موظف حوالي سنتين ونص


والله من المواقف بعد عندي خخخخخخخخخخخخ




بس بقولكم هالموقف



تعرفون ومايخفاكم فني مختبر وشي هن التحاليل دم و بول وبراز الله يعزكم


انا بمركز صحي


وفي عائلة الظاهرة انهم ناويني او شي


كل مايجون يبغون تحليل سواء بول او براز أعزكم الله جابوه في علب غريبه مع اني حاط كرتون كبير ومليان علب


لكن هالعائلة لا تبي تجيب العينه من عندها بعلب خاصه


فأول موقف من ولدهم

دخل علي وانا على مكتبي وجاي هو قدام وجهي وماسك كيس في مويه انا على بالي جايب هديه لي سمكه

خخخخخخخخخخخخخ


لكن استغربت اللون أصفر وقلت وشو ذا قال هذا تحليل للوالده


انا انصدمت قلت صاج انت ولا تستهبل طيب ياخوي مافي شي اسمه علب خاصه


قال مستعجلين وماعندنا بالبيت قلت حصل خير بس المره الثانيه خذ علبه



ودارت الأيام


ويجي اخونا بالله ومعاه قارورة فيفادول وحطها قدام وجهي وقال خذ هذا تحليل


انا على نياتي قلت لا ياخوي هذا المختبر شوف الصديليه هنا>>>>>>>>>>>ك


قال لا لا هذا تحليل بول



على طول عصبت انا قلت بول حاطه بجرة علاج مهبول انت وشلون تبغاني اعطيك نتيجة وصحيحه



شف هالمره بمشيه لك عشاني اعرف ابوك

لكن المره الثانيه مافي الا بعلب زيك زي غيرك


وقبل ماتطلع خذ معك علبه احتياط يمكن تمسك معكم بعد


واخذ وطلع






ودارت الايام



خخخخخخخخخخخخخ







ودخلت المختبر ولقيته مسوي ذيب حاط العيبنه وهاج ( طلع ) وانا ماشفته


وكانت عينه لاخوه الصغير انا شفت الورقة مكتوب تحليل براز


لكن لما شفت العينه كان شكل العلبه غريب


ولقيته حاط العينه بعلبه زعفران هههههههههههههههههههههه


على طول رميت العينه بالزباله وكتبت no sample ورحت فهمت الدكتور قلت اذا جاك احد افراد هالعائلة فهمه اي عينه مو من العلب المخصصه ماراح اقبلها




والمعذره على الاطاله لكن عندي مواقف كثيره







اخوكم احزان الماضي

[فني مختبرM]

هههههههههههههههههههههههههههههه
والله مت من الضحك

مره من المرات تعرفون طلاب الامتياز والتدريب يمشون قروبات تحصل ثلاثه والا اربعه مع بعض

مره كنا نمشي احنا ثلاثه ورازين انفسنا على بالنا دكاتره
المهم فيه شايب مع عياليه....عياله الواحد عمره فوق الثلاثين ويقول لعياله ترى هذولي هم اللي يتعلمون فيها ويأشر علينا بعصاه...........

مره واحد من اصحابي بالتمريض ايام التدريب اول مره يضرب ابره
قالو له اضرب هذا المريض ابره جاه المريض وضربه ابره مع العضل وونسى الابره بمكانها وراح يجيب ابو الشباب قطن وسواب وتيب وهو مروووووق ع الاخر طبعأ الممرضه <<<<< دبست عليه وقالوا للدكتور بس بالاخير نجح

[ahmadz]

المواقف ايام الامتياز
كنت انا وزميلي في قسم الباطنه قسم يجيب الهم والغم :( المهم كله
مرضى كبار السن كنا ناخذ الفيتل صاي العلامات الحيويه
كان فيه مريض شيبه غشيم متوحش لما قرب منه زميلي كان يعطيه طراق على وجه
والله فشيله لاكن ابناء الشيبه هذي جالسين يتفرجون وقت الزياره :D فشله

والموقف الثاني كنت اعطي ابره لعامل هندي فا يوم خلصت من اعطاءه الابره باس يدي وقال نفر سعودي ميه ميه
سستر مافي كويس يعني الفلبينيه :p يمكن يبي ينفخني صحيح انتفخت انا وكاني مسوي عمليه فصل توئم :D

[~ غـ ـ ـلا الـ ـورد ~]

مســـاء الخير

اولا والله موضوعكم يجنن وينسينا مشاكلنا..
ثانيا موقف ابو علبة زعفران موتني ضحك..مو طبيعي..


انا توني من سنه ممرضه..ولو بكتب المواقف والله لاكتب مجلدات..بس من المواقف اللي صارت معي..

انا احيانا استلم عينات المختبر عن زميلتي..وفي الفتره اللي راحت واحد صجنا ببنته لتسجيل المدرسه
كل يوم يجي بنهاية الدوام يبغي يسوي لها تحاليل..
هذاك اليوم مسوي فيها جاي بدري قبل صلاة الظهر ويعنني جايب التحاليل معه(يبغى يفتك)..
جا الاخ مع تحاليل البول البراز عزكم الله..قلت له اخوي المختبر قلنا لك الف مره يفتح الصباح بس..
قال يالله مشيها..يابن الحلال مايصيراللي يستلم العينات مشى..قال حطيها بالثلاجه لبكره:eek: (وع)..يالطيب ماينفع..قال اجل بخليها بثلاجة بيتنا لبكره:eek: ..يااخ العرب ماتجي..
..قال الحل؟...قلت خذ علب ثانيه وجيبها بكره من بدري..
وش رد الرجال؟

(اخليها تسوي مره ثانيه؟..هـذا استهــلاك من بني آدم )

لا تعليق:confused: ...


الموقف الثاني..
جا مريض معروف بالحي انه له طقات..وجيش عياله دايم يجون معه(تقول حديقة الملك فهد)..
ولا جا دايم يسوي زحمه ومايعجبه شي..
هذاك اليوم جا وغريبه شفته لحاله..دخل غرفة الفايتل ساينس..
شوي الا يطمر ولده ..يبا يبا..والاخ ماسك معه كوره..
الا يقول له ابوه..ايه العب وانا ابوك مع اخوانك بهذيك الغرفه على مااخلص:cool: ..
والا الاخوان قالبينها مباره كوره..
ماصار شي..بس انكسرت اللمبه وانكفخ بزر..



غـــــلا الـورد

[نادرالعدني]

الف شكر لكم اخواني / اخواتي على المشاركات الرائعة جدا

اطلب من المشرف العام تثبيت الموضوع

وشكرا

[مرهب2004]

من جد مواقف مضحكه ويشكر نادر على اضافته للموضوع ...
انا المواقف اللي بقولها حصلت معي ومع زميلي .... .......
ذاك اليوم جالسين بالاسعاف مدرينا الا بالهندي اللي داخل علينا رابط رجله ...سلامات سلامات قال رجل مسمار قلت زين

مسمار انسدح بناديلك الدكتور ...ويجي الدكتور قال عطوه ابره ....قلت ان شاءالله واكلم الهندي صديق نوم نوم ابره

قالي مافي وجع قلتله لا الوكاد واعطيه الابره ويوم عطيته نسيت القطنه ولا عندي قطن ياربي وش اسوي ..قلت خلك نايم

لين اجي وانا اروح ادور قطن والابره في مؤخرة الهندي لين رجعت ذاك اليوم الله لايوريكم لو شايفني الدكتور كان رحت فيها
...........
الموقف الثاني :بمستوصف طبعا الدكاتره او ل مايجون لازم تطعيم هالدكتور اللي جاء للمركز خايف من الابره قلت

يدكتور لازم علشان تحصن نفسك ضد الامراض ....قال مايحتاج قلت خلاص مراح اطعمك....بس عندي شرط ..لاجاء المدير وسئلك انك طعمت ولا لا قل ايه مطعم ...على نياتي ...ويجي المدير ويسئله قال الدكتور المصري ..لا ماطعمنيش ..واناظر فيه انا ماطعمتك قال ايه انا مابحبش الكذب ...قلت تعال اعلمك وشلون التطعيم ...ومن بعدها توبه.

[topnurse]

شكرا اخوي نادر على هذه المبادرة .........
عجبني موقف المختبر .......... عينة بول بالكيس ههههههههههههههههههه وعلبة زعفران هههههههههههه

مرت على مواقف كثيرة بصراحة بس في موقف صارلي مع دكتور هو كان طالب امتياز وانا كنت ممرضة امتياز وكنت مسئولة عن مريضته وسألني الصباح اذا بدينا المضاد الحيويiv لها اولا انا طبعا كنت غايبة لي يومين ولا ادري ولما استلمت الشفت ما انتبهت ايش تأخذ ادوية المهم انا قلت له لا ومشيت ...... بعدين لما جاء الاستشاري وبدنا الراوند المرور وصلو عند المريضة وانا معاهم تكلم دكتور الامتياز وبداء يشرح الحالة وسأله الاستشاري ايش تأخذ مضاد رد قال ما بدأت وانا ببدألها اليوم.... انا تفلسفت وقلت لا هي بديت من يومين وتأخذ الدواء الفلاني والجرعة كذا وكذا طبعا قريت وعرفت بس نسيت اعلم الدكتور وهو ما قراء اعتمد على كلامي ......المهم الاستشاري بداء يتكلم ويقوله انت ما تعرف مريضتك ايش تأخذ والدكتور انحرج ويناظر فيني بطريقة شوي ويذبحني ...هههههههههههههههههه صراحة موقف يضحك .....بس انا مالي ذنب هو المفروض يقراء الملف ................

اتمنى ان الموضوع يتثبت ..

[رحيق الولاء]

مره جات لنا حاله في مركز صحي وكانت حاله اسعافيه المهم سوينا الي علينا ونقلنا المريضه بسيارة الاسعاف المهم كانوا الناس متجمهرين على السياره يبون يشوفون الحاله شان السيارة ترجع على وراء وتصدم طفل عمره 6 سنين وننقل الطفل مع المريضه في سيارة الاسعاف لان الطفل تعور .المثل يقول جاي يكحلها عماها هههههههههههههه
ومره الاب جاي يبي يعالج ولده في عيادة الاسنان الولد مسكين مايدري وين رايح داخله ابوه عيادة الاسنان شان الطفل يتخرع من الدكتوره ويشرد ويطلع خارج المركز والطفل وهو يركض وابوه وراءه شان يظرب راسه في كبينة التلفون ويجيبه ابوه حاملنه وثيابه مليانه دم من الخوف الاب دخل قسم النساء وهو حامل ولده جينا اخدنا الولد منه شان تشوفه ام الولد وهيا تنتظر تدخل لدكتورة النساء شان الام يغمي عليها اشوي الاب يشوف الام طاحت شان يطيح وراءها بالصاله الانتظار وصرنا نعالج الثلاثه وحنا نضحك على الموقف بس الحمد لله اول ماصحو اشكرونا ههههههههههههههههه
http://www.pc4up.com/imjpg/4Cf03845.jpg (http://www.pc4up.com/)

[الساهر888]

موقف كل ماتذكره اضحك عليه
احدى المرضى جاءت الى قسم المختبر وكانت عامله تحليل حمل
المهم جات المريضه وطلبت النتيجه من فني المختبر واصرت انها تعرف النتيجه منه
بعد ما عرفت انها حامل خذت الورقه ورمتها بوجهه
بعدها بدقايق رجعت ع شان تبي تاخذ الورقه
تتوقعو ايش ردت فعل الفني
قال لها اذا بتعصبين لا تعصبي علينا عصبي على اللي حملك

[عبير عبدالعزيز]

كنت جديده في القسم وجانا حالة تصوير ثدي لمريض رجال فقمت متحمسه مابي المريض المسكين ينتضر هههههههههههههههه
كان المطلوب مني تدريب الزميل علي الجهاز لكي يتعلم وصور الرجل المريض
ولاكن طلعت متحمسه وشفت زميلنا الثاني واقف عن الباب وانا احسبه المريض (زميلنا كان دبدوب شوي) وانا اطالع فيه وقله اجلس في الاستراحه الان يجي الفني ويصورك هههههههههههههههههههه قمت الاحراج لما جاء الزميل الي راح ادربه وقالي هاذا زميلنا فلان احرررررررررررررررررررررررررررراج

[loda]

هههههههههههههههههههههههههههههههههههههههههههههههههه ههههههههه
حلوة يا اخت عبير عبدالعزيز:)

[الشهري888]

السلام عليكم ورحمة الله وبركاته
شكرا لأخي ولطرحه المميزوالمسلي ..
موقف صار لي .. وياليته مع مريض ... المشكله مع الممرضه وانا في التدريب.... اول اسبوع
كنت جالس مع الممرضين والدكاتره في قسم الطوارئ شوي قالت ممرضه ممتازه يعني تساعدني وتعلمني بعض الاحيان فقالت لي ممكن تساعدني فهمت كلامها وقلت حاضر لاني ماكنت ملم باللغه الانجليزيه
المهم قالتلي كلام وكاني سمعت انها تقول أوفيس او كذا وقالت خذ المريض معك والمشكله المريض سعودي قلت لمريض وراي يعني كأني دكتور وشايف نفسي وبسم الله وأحولبه على المختبر واعطيهم الأوراق اللي معي وقلت لهم تحليل شامل وأقعد أكثر من ساعتين واخذ التحاليل اللي اعطوني والمريض معي واروح الطوارئ المهم كانوا ثلاث ممرضات جالسات هنديتين وفلبينيه يوم جيت شافتني من بعيد استغربت ويوم وصلت اعطيتها الوراق
موقف الله لا يوريكم ضحكو ضحك شنيع ... وقامو يناضرونوني والسعودي مشفر معهم وماهو فاهم شي
قالتلي الفليبينيه قالتلك ود المريض مكتب الدخول تنويم .. وانت رحت تسويله تحاليل
صرفو الموضوع وودوه المريض وكل ماشافتني في اي قسم تموت ضحك علي
سامحوني على الإطاله

[القمر كله]

ههه وربي مواقف جنان
انا بس ادخل السنه كل المواقف اللي بتصير لي بقولها ههه
يسلموو

[DR-malealone]

خذو هالموقف

كنت في مستوصف في منى وقت الحج

في شفت اخر الليل ....قبل 3 سنوات كنت اول سنه لي في الخدمه ....جانا شلة صعايده حاملين خويهم ما يقدر يتنفس ....قلت ليهم ابطحوه على السرير ...قلت للممرض نادي الدكتور باسل (دكتور معانا الله يذكره بالخير سوري تخصص طوارئ) واخلي الممرضين يفتحو له اي في لاين احتياط لاي طارئ

واروح افحص الرجال الا النبض سليم ...قلت هذا يمكن عنده بلموناري امبيلزم والا شي .....فحصت صدره ...سليم ما فيه شي ....يابن الناس ...ويش فيك ...الا هذا الرجال فجاه جلس يبكي وينوح وقاعد يوصي خويه (خلي بالك من العيال يامرسي) ومن هالكلام دا....قلت له ابو الشباب ويش فيك ..قال لي كحه ...قلت له فيك شي ثاني قال لي لا

قلت له يابن الحلال انت ما بتموت الا باذن الله ..لكن الحين ما فيك شي

هههههههههههههههه

الرجال اول ما سمع كذا قالي لي (يعني انا مش حموت ) قلت له لا ...ما شفت الا الرجال قايم على رجليه وطالع وهوه يسولف وايا اصحابه ما كانه كان محمول قبل 5 دقايق ....لا ابره ولا دوا ولا نيله

الفشله يوم جو الاطباء الثانيين يركضوا وهم يقولو لي وين المريض اللي بيودع ....قلت ليهم داهوه وشافوه يمشي ويضحك وايا خوياه ......وانا كل الفتره اللي قعدتها واياه ما تجي الا 5 دقايق ( يعني ما يمديك تكذبها وتعمل ابضاي وتقول انقذته ) الله يهديه خل وجهي زي السمسمايه قدام بقية الدكاتره

[اسم الله عليك اما انت]

مرة من المرااات ايام الامتياز وانا بقسم الباطنيه عند الشيبان لابس بالطو التمريض وفرحان فيه وامشي بالسيب

وغرف المرض مفتوحه ابوابها على السيب الا يشوفني شايب ويناديني يادكتور يادكتوووور


قلت ياولد يقلك دكتور والله لاشوفه واتفلسف عليه اسوي دكتور وادخل عنده قلت نعم خير ان شاء الله ياوالد

وراز وجهي اسوي بافحص عليه الا يقول ابيك تعدل الشرشف قلت امحق بغى يكبر راسي واصير دكتور اخر شي عدل الشرشف والله ولاتسوى الرزة

ههههههههههههههههههههههههههههههه

.............................

الموقف الثاني :

دخل عينا مريض بالطواري وماسك على يدة وش فيك قال عظني كلب قال الدكتور اعطه

ابرة تبع تسمم الكلاب واقوم احضر المصل واعطيه بعد مانضفتها واسولف معه

وشلون عضك قال تهاوشت انا وياة ؟؟

قلت من جدك متهاوش مع كلب !!
قال مو كلب كلب هو جارنا بس الكلب احسن منه ؟؟
اخذت الموضوع بهدو واروح اقول للدكتور وهو يفقع ضحك
وبعدين قام يصرف الموضوع عند المريض يقول عطيناك ابرة عشان ماتحس المها

وبعدين مرة ثانيه لاعاد تتهاوش مع كلاب ......

هههههههههههههههههههههههههه